Loftslags­breytingar

Aðgerðir og árangur

Í samræmi við umhverfisstefnu hefur Sjóvá sett markmið og mælikvarða til að fylgjast með þróun umhverfisvísa og notkun auðlinda í rekstrinum. Leitast er við að minnka umhverfisspor eftir föngum, styðja við hringrásarhagkerfið og minnka losun gróðurhúsalofttegunda með fjölþættum verkefnum.

Kolefnislosun og kolefnisbinding

Nánari upplýsingar um losun má finna í kafla um UFS mælikvarða.

Sjóvá hefur verið með samning við Kolvið um kolefnisbindingu með skógrækt til jöfnunar losunar frá starfseminni. Að auki hefur félagið keypt kolefniseiningar frá Kötlu Carbon (áður SoGreen), sem vinnur að forðun losunar með menntaverkefnum fyrir stúlkur í Afríku.

Dregið úr akstri með fjarskoðunum

Undanfarin ár hefur starfsfólk okkar sem sinnir tjónamati notað fjarskoðunarbúnaðinn Innsýn við skoðanir og hefur tekist að spara umtalsverðan akstur með þessu fyrirkomulagi, bæði okkar starfsfólks og viðskiptavina. Í lok árs 2024 var byrjað að nota lausnina í auknum mæli í fasteignaskoðunum við kaup trygginga en segja má að það skref hafi verið stigið til fulls á árinu 2025. Þannig fóru langflestar skoðanir við tryggingatöku á fasteignum fram rafrænt á því ári.

Á árinu 2025 sparaði notkun Innsýnar starfsfólki okkar akstur sem nam um 105.477 km, miðað við útreikninga í fjarskoðunarlausninni, en sambærilegir útreikningar sýndu sparnað upp á 33.348 km 2024.

Ávinningurinn af aukinni notkun Innsýnar er margþættur; stórbætt þjónustuupplifun viðskiptavina, aukin skilvirkni og minna kolefnisspor. Viðtökur viðskiptavina hafa enda verið góðar og endurspeglað ánægju með þessa þjónustuleið.

Áframhaldandi áhersla á framrúðuviðgerðir

Síðustu misseri hefur Sjóvá lagt mikið upp úr að vekja athygli á ávinningi þess að láta gera við þær framrúður sem verða fyrir tjóni í stað þess að láta skipta þeim út. Þetta átak hefur verið unnið í góðu samstarfi við verkstæði um land allt, meðal annars með dreifingu framrúðuplástra sem geta aukið líkurnar á að hægt sé að gera við skemmdir á rúðum.

Þrátt fyrir áframhaldandi áherslu á þessi mál lækkaði hlutfall framrúðuviðgerða á móti framrúðuskiptum lítillega þetta árið, var 16,1% 2025 en hafði farið upp í 17,2% 2024. Það er því fullt tilefni til að gefa hér enn betur í en Sjóvá hefur sett sér markmið um að ná að gera við að minnsta kosti 20% framrúða sem verða fyrir tjóni.

Það hefur verið reiknað út að það losi 24.000 sinnum minni koltvísýring að láta gera við skemmd á bílrúðu en að láta skipta henni út. Sjóvá greiðir að auki viðgerðina að fullu ef hægt er að gera við framrúðuna, viðskiptavinur sleppur við eigin áhættu og missir ekki árlega endurgreiðslu vegna tjónleysis, sem hann fær ef hann er í Stofni. Ávinningurinn er því margþættur, bæði fyrir viðskiptavininn og samfélagið allt. Þó að lækkun hafi orðið á þessu hlutfalli frá fyrra ári teljum við að viðskiptavinir séu orðnir meðvitaðri um ávinninginn af framrúðuviðgerðum og því góður jarðvegur til staðar til að auka vitundina enn frekar og auka hlutfall framrúðuviðgerða á komandi árum.

Endurnýting tjónsmuna, lengri líftími og förgun

Þegar munur verður fyrir tjóni þarf alls ekki að vera að hann sé þar með orðinn ónothæfur. Við leggjum okkur fram um að tryggja að tjónsmunir sem enn hafa notagildi nýtist áfram, með það að leiðarljósi stuðla að lengri líftíma muna, lágmarka sóun, minnka úrgangsmyndun og þar með umhverfisspor tjóna eins og mögulegt er, með tilheyrandi samfélagslegum ávinningi.

Þegar viðskiptavinir okkar eiga bótarétt vegna muna sem hafa skemmst bjóðum við þeim, þegar það er hægt, val milli þess að fá fullar bætur fyrir hlutinn gegn afhendingu hans eða að viðskiptavinurinn fái að halda nýtilegum hlut og fái greiddar bætur að hluta. Þessi nálgun dregur úr sóun, minnkar úrgangsmyndun og eykur val viðskiptavina. Aukin áhersla hefur verið lögð á þessa leið við afgreiðslu munatjóna og hafa viðtökur viðskiptavina verið jákvæðar.

Sjóvá leggur síðan ríka áherslu á að endurnota þá tjónsmuni sem félagið eignast, með það að markmiði að lágmarka sóun og stuðla að skilvirkri nýtingu muna. Þótt endurnýting sé ekki alltaf möguleg er markvisst leitað leiða til að tryggja að munir sem enn eru nýtilegir fái áframhaldandi hlutverk. Með þetta að markmiði hefur verið byggt upp gott samstarf við fjölbreyttan hóp samstarfsaðila, þar sem tjónsmunir fá lengdan líftíma og nýtast meðal annars til kennslu, þjálfunar og til starfsendurhæfingar.

Sólheimar í Grímsnesi fengu alls 50 sendingar á árinu af búnaði sem nýttist í þeirra mikilvæga starfi. Þá var haldið áfram samvinnu við Fjölsmiðjur og Borgarholtsskóla. Samtals voru afhentar 30 sendingar til Fjölsmiðjunnar í Reykjavík, 7 sendingar til Fjölsmiðjunnar á Suðurnesjum og 14 sendingar til Borgarholtsskóla. Sendingarnar innihéldu meðal annars matvöru, reiðhjól, tölvu- og tæknibúnað, málningu, byggingavörur og aðra nytjahluti sem fengu nýtt hlutverk og lengdan líftíma. Sjóvá hefur um áratugaskeið verið aðalstyrktaraðili Slysavarnarfélagsins Landsbjargar og átt í fjölbreyttu og farsælu samstarfi við samtökin, eins og greint er frá í kafla um forvarnir. Á árinu 2025 gátum við bætt við stuðning með 6 sendingum af byggingavöru sem nýttust í starfsemi samtakanna.

Hjá Sjóvá er lögð áhersla á ábyrga förgun þeirra muna sem ekki er unnt að gera við eða endurnota. Á árinu var tæplega 290 einingum fargað en þar var endurnýting var ekki möguleg. Allir málmar og tæki sem ekki var hægt að endurnýta voru send til endurvinnslu hjá Hringrás, í samræmi við áherslur fyrirtækisins um ábyrga úrgangsstjórnun og hringrásarhagkerfið.

Rafrænar tjónstilkynningar

Við höfum undanfarin ár lagt áherslu á að auka hlutfall þeirra sem tilkynna tjón til okkar með rafrænum hætti. Rafrænar tjónstilkynningar gera okkur kleift að hefja afgreiðslu máls fljótt og örugglega, þar sem allar upplýsingar liggja fyrir og við getum þannig veitt viðskiptavinum enn betri þjónustu. Árið 2025 voru 82,6% tjónstilkynninga rafrænar, sem er hækkun frá 2024 þegar hlutfallið var 80,4%.

Rafræn viðskipti

Á undanförnum árum hefur fækkað mjög í hópi viðskiptavina sem kjósa að fá upplýsingar sendar til sín á pappír. Í árslok 2025 voru 95,4% viðskiptavina okkar í rafrænum viðskiptum, sem þýðir að þau fá allar upplýsingar um sín mál sendar til sín með rafrænum hætti. Þetta er örlítil fjölgun frá árinu 2024 þegar hlutfallið var 94,1% en það hafði verið 72% árið 2023. Við gerum ekki ráð fyrir að mikil aukning verði héðan af á þessu hlutfalli, þar sem leiða má líkur að því að einhverjir viðskiptavinir kjósi einfaldlega að fá sínar upplýsingar á pappírformi og er þá að sjálfsögðu orðið við þeim óskum.

Sem fyrr sparaðist mikill akstur með notkun rafrænna undirritanna, eða sem nam 757.478 km samkvæmt reiknivél hugbúnaðarfyrirtækisins Taktikal sem rekur undirritunarlausnina sem Sjóvá notar. Það er þónokkur aukning frá árinu 2024, þegar sparnaðurinn var upp á 680.665 km.

Samgöngusamningar við starfsfólk

Undanfarin ár hefur starfsfólki boðist að gera samgöngusamninga, sem fela í sér skuldbindingu um að nota vistvæna samgöngumáta í 80% af ferðum til og frá vinnu. Starfsmaðurinn fær þá greiddan samgöngustyrk frá Sjóvá mánaðarlega. Markmiðið er að styðja starfsfólk við að nýta umhverfisvænni ferðamáta til og frá vinnu; ganga, hjóla eða nota almenningssamgöngur. Fleira starfsfólk nýtti sér þetta á árinu 2025 en árin á undan því 27% fleiri samningar voru gerðir þá en árið 2024.

UFS áhættumat fyrir umhverfisþætti

Samkvæmt UFS áhættumati Reitunar sem unnið var á árinu 2025 fékk Sjóvá 88 stig af 100 mögulegum fyrir umhverfisþætti og einkunnina A3. Fyrir undirliðinn „Nýting auðlinda og hringrásarhagkerfið“ fékk Sjóvá 94 stig af 100 og einkunnina A2.

Markmið

• Að draga úr losun frá starfsemi félagsins.
• Að draga úr losun frá eigin samgöngum og ferðum starfsfólks til og frá vinnu.
• Að auka hlutfall vefskráningar tjóna.
• Að upplýsa viðskiptavini um kosti umhverfisvænni tjónaþjónustu til að auka veg hennar og minnka sóun, m.a. með að auka hlutfall framrúðuviðgerða í stað framrúðuskipta.