Tjónaþjónusta

Þegar óvæntir atburðir eiga sér stað og viðskiptavinir lenda í tjóni skiptir máli að þeir geti treyst á öfluga og skilvirka þjónustu tryggingafélagsins síns. Tjónaþjónusta Sjóvár er hönnuð með þarfir viðskiptavina að leiðarljósi og byggir hún á fagmennsku, hraða og persónulegri nálgun. Við vinnum stöðugt að því að einfalda ferla og bæta upplifun viðskiptavina, frá upphafi til enda.

Við nýtum tæknilausnir í auknum mæli til að gera samskipti og þjónustu vegna tjóna einfaldari og skilvirkari. Þegar aðstæður krefjast tafarlausra viðbragða er alltaf hægt að leita beint til tjónavaktar okkar, þar sem starfsfólk er ávallt til þjónustu reiðubúið.

39.929

tjón voru tilkynnt til okkar á árinu.

Skjót viðbrögð geta skipt sköpum

Tjónaþjónusta okkar er í boði allan sólarhringinn, alla daga ársins. Skjót viðbrögð og fagleg vinnubrögð geta skipt öllu máli þegar tjón verður og jafnvel dregið verulega úr umfangi þess. Með því að bregðast hratt við verjum við ekki eingöngu hagsmuni viðskiptavina, heldur leggjum um leið okkar af mörkum til að lágmarka sóun og umhverfisáhrif sem fylgja tjónum.

Það er reynslumikill hópur sérfræðinga sem sinnir þjónustu vegna eigna-, ökutækja- og persónutjóna. Þekking, reynsla og sérhæfing þeirra tryggir að hvert mál fái vandaða og faglega meðhöndlun, hvort sem um er að ræða minniháttar atvik eða umfangsmikil tjón. Þegar þörf krefur leitum við til sérfræðinga og valinna samstarfsaðila sem aðstoða og styðja okkur við að veita viðskiptavinum framúrskarandi þjónustu.

„Ég þakka fyrir góðar móttökur og jákvæðan starfsmann og umfram allt faglega þjónustu. Það er gott koma því orkan er afslöppuð og góð.“

Endurgjöf nýtt til umbóta

Í tjónaþjónustunni leggjum við, líkt og annars staðar, áherslu á virkt samtal við viðskiptavini. Við notum endurgjöf þeirra markvisst til að þróa þjónustu okkar áfram og bæta hana enn frekar. Aldrei hafa verið sendar fleiri þjónustukannanir í kjölfar tjónaþjónustu en á árinu 2025. Svör viðskiptavina gera okkur kleift að fanga betur upplifun þeirra á öllu ferlinu. Ánægja þeirra með þjónustuna er lykillinn að áframhaldandi árangri. Því rýnum við vel í svör viðskiptavina, bæði um það sem þeir eru ánægðir með og það sem er þeim ekki að skapi. Markmið okkar er að viðskiptavinir upplifi öryggi, skilning og stuðning í samskiptum við okkur þegar þeir verða fyrir tjóni, sérstaklega þegar aðstæður þeirra eru krefjandi.

„Ég er langtíma viðskiptavinur hjá Sjóvá og hef í gegnum tíðina fengið góða þjónustu og gott viðmót hjá starfsfólki ykkar. Því miður hefur þetta ár verið óhappaár hjá mér og við nokkur tilfelli hef ég þurft að nota tryggingarnar í sambandi við óhöpp í umferðinni. Mér hefur verið þjónað vel og allt hefur verið bætt mér til ánægju.“

Sjálfbærni í tjónaþjónustu

Við höfum lengi haft sjálfbærni að leiðarljósi í tjónaþjónustu okkar, hvort sem það er með því að koma í veg fyrir tjón með margvíslegu forvarnastarfi, lágmarka umfang þeirra eða takmarka umhverfisspor þjónustunnar. Hér, eins og svo oft, skiptir samstarf við viðskiptavini og fjölbreyttan hóp samstarfsaðila öllu máli til að sem bestur árangur náist.

Nánari upplýsingar um þau verkefni sem unnið var að á árinu tengd sjálfbærni í tjónaþjónustu má sjá í umfjöllun um loftslagsbreytingar og forvarnir.

Við greiddum fyrir viðgerðir á yfir

15.000

ökutækjum á árinu.

Við greiddum fyrir læknisheimsóknir yfir

1200

dýra á árinu.

Endurgjöf nýtt til umbóta