Árs- og sjálfbærniskýrsla

Við héldum áfram vinnu við að þétta starfsemina og auka samvinnu ólíkra starfsstöðva, til að auka skilvirkni, samræma ráðgjöf og tryggja samræmt þjónustustig um land allt.

Afar mikilvægur hluti af okkar starfi er að veita góða ráðgjöf sem byggir á þekkingu, hvort sem það er á tryggingavernd, forvörnum eða fyrstu viðbrögðum við tjóni. Fyrir vikið er afar mikilvægt að miðla þessari þekkingu vel og tryggja að hún nýtist öllum viðskiptavinum, hvar sem þeir búa.

Með þetta að leiðarljósi höfum við fækkað starfandi umboðsmönnum okkar en á sama tíma fjölgað stöðugildum í útibúum á landsbyggðinni, og breytt umboðsskrifstofum í útibú. Að auki voru gerðar vel heppnaðar tilraunir á árinu með að hafa viðveru á nýjum stöðum, svo sem á Patreksfirði, Hólmavík, Þórshöfn og Höfn, þannig að fleiri gætu sótt til okkar ráðgjöf og þjónustu í sinni heimabyggð.

Í lok árs voru starfrækt 12 útibú víðsvegar um landið, auk höfuðstöðvanna í Reykjavík, og hafði útibúum þá fjölgað um eitt frá síðasta ári. Frá þessum tíma hefur einnig bæst við útibú í Höfn, sem opnað var í febrúar 2025.

Á myndinni hér fyrir neðan sjást starfsstöðvar Sjóvár í febrúar 2025.

Á árinu 2024 var farið í stefnumótunarvinnu með öllu starfsfólki, meðal annars með það að markmiði að mæta þörfum viðskiptavina enn betur. Rýnt var í hvaða breytingar væru að verða á þörfum ólíkra hópa, á samfélaginu yfirleitt og eins á tryggingamarkaði. Hluti af niðurstöðum þessarar vinnu var að uppfæra framtíðarsýn, hlutverk og gildi félagsins, en þar er framúrskarandi þjónusta áfram í forgrunni með enn ríkari áherslu á að byggja til framtíðar á þekkingu starfsfólks og forvarnarstarfi.

Hlutverk Við stuðlum að betra samfélagi.      

Framtíðarsýn Við göngum lengra í þjónustu við viðskiptavini og stuðlum að öryggi þeirra.

Gildi Við sýnum umhyggju. Við byggjum á þekkingu. Við einföldum hlutina. Við erum kvik.

Á grunni þessarar vinnu voru ný markmið sett á árinu og aðgerðir skilgreindar til að styðja við þessa þætti.

Eins og flest þekkja hafa orðið talsverðar breytingar á íslenskum tryggingamarkaði á undanförnum árum með sameiningum og samstarfi banka og trygginga. Við hjá Sjóvá höfum í þessu umhverfi ákveðna sérstöðu með því að halda skýrri áherslu á kjarnastarfsemi okkar; tryggingar, tjónaþjónustu og forvarnir. Með því að efla enn frekar sérþekkingu starfsfólks og miðla henni vel getum við haldið áfram að veita viðskiptavinum okkar framúrskarandi þjónustu og ráðgjöf hverju sinni og stuðlað að ánægju þeirra.

Nánari upplýsingar um þjálfun, fræðslu og endurmenntun starfsfólks er að finna í umfjöllun um mannauð.

Sjóvá lýtur eftirliti Fjármálaeftirlits Seðlabanka Íslands og hefur komið á samhæfðri áhættustýringu sem nær til allra rekstrarþátta félagsins og sett sér áhættustefnu sem lýsir umgjörð áhættustýringar. Áhættustefnan tekur til allra áhættuþátta sem krafist er í lögum um vátryggingastarfsemi og reglugerð um vátryggingastarfsemi. Stefnan var síðast endurnýjuð 4. desember 2024.

Stjórnkerfi og skipulag félagsins eru skráð í gæðakerfi þess. Leiðbeiningar fyrir starfsmenn félagsins miða að því að hver og einn beri ábyrgð á gæðum vinnu sinnar, þjónustu félagsins og upplýsingaöryggi. Innra eftirlit er innbyggt í verklagsreglur félagsins og eru innri úttektir og áhættugreiningar framkvæmdar reglulega.

Félagið leggur áherslu á skýra verkaskiptingu og ábyrgð. Uppbygging Sjóvár á eigin starfsemi er í samræmi við þrjár línur innra eftirlits. Tekið hefur verið saman heildstætt yfirlit um innra eftirlit, áhættukort (e. assurance map) sem gefur góðar upplýsingar um umfang eftirlits á öllum innri eftirlitsþáttum og gerir mögulegt að sannreyna niðurstöður og meta eftirlitið og umfang þess. Regluleg skýrslugjöf er varðar sjálfbærniþætti, fjárfestingar, og rekstrarlega afkomu einstakra sviða starfseminnar, er mikilvægur þáttur innra eftirlits. Mánaðarlegar skýrslur um rekstrarlega afkomu, ófjárhagslegar upplýsingar og fjárfestingar, ársfjórðungslegar skýrslur um áhættustýringu, eigið áhættu- og gjaldþolsmat sem framkvæmt er að lágmarki árlega, árleg skýrsla um gjaldþol og fjárhagslega stöðu og reglubundnar skýrslur til eftirlitsaðila sem og aðrar reglulegar úttektir miða að því að tryggja gagnsæi í starfseminni. Þær auðvelda félaginu einnig að uppgötva og leiðrétta hugsanlegar skekkjur, fylgjast með frávikum og sveiflum í starfseminni og gefa svigrúm til að bregðast við ef áhættuþættir eða breytingar í rekstrarumhverfi gefa tilefni til. Framkvæmdastjórn fundar hið minnsta mánaðarlega með áhættu- og öryggisnefnd, ársfjórðungslega er farið yfir ytri áhættur og einstakir framkvæmdastjórar eiga að lágmarki árlegan fund með áhættu- og öryggisnefnd um áhættur þeirra ábyrgðarsviðs, fjalla um hvernig stýringu og eftirliti með áhættum er háttað og meta hvort það sé fullnægjandi.

Starfssvið áhættustjóra, regluvörslu, tryggingastærðfræðings og innri endurskoðanda teljast til lykilstarfssviða samkvæmt lögum um vátryggingastarfsemi og skulu þeir einstaklingar sem þeim sinna uppfylla sérstakar kröfur um hæfi og hæfni.

Tryggingastærðfræðingur félagsins hefur reglulegt eftirlit með því að iðgjaldaskrár endurspegli raunverulega vátryggingalega áhættu og séu í samræmi við afkomumarkmið. Tjónaskuld og endurtryggingavernd félagsins eru metnar með reglulegum hætti og þess gætt að þær séu í samræmi við þarfir félagsins og skuldbindingar þess. Auk þessa tekur tryggingastærðfræðingur saman árlega skýrslu fyrir stjórn félagsins um verkefni starfssviðsins, niðurstöður þeirra ásamt ábendingum.

Sjóvá hlaut árið 2014 vottun á upplýsingaöryggi samkvæmt ISO/IEC 27001 staðlinum sem staðfestir að rekstur upplýsingakerfa félagsins sé í samræmi við kröfur staðalsins og var vottunin síðast endurnýjuð í júní 2024.

Endurskoðun ársreiknings félagsins er í höndum KPMG ehf. sem kosið var á aðalfundi árið 2024 til eins árs. Innri endurskoðun er útvistað til PwC ehf.

Hlutverk Sjóvár er að stuðla að betra samfélagi.

Framtíðarsýnin er „Við göngum lengra í þjónustu við viðskiptavini og stuðlum að öryggi þeirra“.

Gildi Sjóvár eru; „Við sýnum umhyggju“, „Við byggjum á þekkingu“, „Við einföldum hlutina“ og „Við erum kvik“.

Gildin eru leiðbeinandi í ákvörðunum stjórnar og starfsfólks og leggja grunn að þeirri framtíðarsýn sem unnið er að innan félagsins. Nánar er fjallað um viðskiptalíkan og stefnumótun á árinu í kafla um ófjárhagslega upplýsingagjöf í ársreikningi samstæðunnar.

Sjóvá fylgir í hvívetna þeim lögum og reglum sem um starfsemina gilda. Leitast er við að stjórnarhættir séu í samræmi við leiðbeiningar um stjórnarhætti og þær kröfur sem gerðar eru til félagsins sem er eftirlitsskyldur aðili og skráður í kauphöll. Sjóvá hefur skýra stefnu um að vinna gegn hvers konar spillingu, glæpsamlegri starfsemi og peningaþvætti í öllum viðskiptum félagsins.

Sjóvá hefur verið aðili að Festu, miðstöð um samfélagsábyrgð frá árinu 2014 og gerðist aðili á UN Global Compact árið 2024.

Sjóvá vinnur að því að auka samþættingu áherslna Heimsmarkmiða Sameinuðu þjóðanna um sjálfbæra þróun við markmið í starfseminni. Tengt er við fimm heimsmarkmiðanna þ.e. markmið 3 um heilsu og vellíðan, 5 um jafnrétti kynjanna, 8 um góða atvinnu og hagvöxt, 12 um ábyrga neyslu og 13 um aðgerðir í loftslagsmálum. Í samræmi við eðli rekstrarins hefur megináhersla verið lögð á forvarnir, jafnréttismál, heilbrigðan rekstur og framþróun í samræmi við markmið 3, 5 og 8. Einnig er leitast við að tryggja ábyrga neyslu og stuðla að umhverfisvænum lausnum samkvæmt markmiði 12 og grípa til bráðra aðgerða gegn loftslagsbreytingum og áhrifum þeirra í samræmi við markmið 13.

Áherslur Sjóvár í forvörnum tengjast markmiði 3 um heilsu og vellíðan þar sem sett eru fram markmið um helmings fækkun alvarlega slasaðra og dauðsfalla vegna umferðarslysa fyrir árið 2030 og markmiði 12 um ábyrga neyslu og framleiðslu um að draga verulega úr sóun með forvörnum, minnkun úrgangs, aukinni endurvinnslu og endurnýtingu. Hjá Sjóvá hefur um árabil verið lögð mikil áhersla á að vinna með viðskiptavinum að forvörnum, bæði einstaklingum og fyrirtækjum. Sjóvá er með samstarfs- og bakhjarlssamning við Slysavarnafélagið Landsbjörg og á í fjölþættu samstarfi við samtökin, einkum á vettvangi forvarna.

Í tjónum og tjónavinnslu er leitast við að minnka sóun og stuðla að umhverfisvænum lausnum. Áfram var unnið með átak í að auka hlutfall framrúðuviðgerða í stað þess að skipta þeim út þegar þess er kostur bæði með vitundarvakningu og aukinni upplýsingagjöf til viðskiptavina, og samstarfi við viðgerðaraðila. Leitast er við að minnka sóun sem felur í sér að viðskiptavinir hafa val um að fá bætur og nýta áfram minna skemmda og viðgerðarhæfa muni. Notkun fjarskoðunarlausnarinnar Innsýnar hefur gert félaginu kleift að draga umtalsvert úr akstri á sama tíma og hægt er að veita hraðari og betri þjónustu.

Sjóvá hefur um árabil lagt áherslu á að tryggja jöfn tækifæri og jafnrétti kynja til ábyrgðar og launa í samræmi við heimsmarkmið 5 og 8. Mannréttindastefna og árleg aðgerðaáætlun eru rammi utan um framkvæmd stefnunnar. Félagið hefur sett sér umhverfisstefnu, fylgist með þróun umhverfisvísa og notkun auðlinda í rekstrinum, og leitast er við að minnka losun gróðurhúsalofttegunda. Sjóvá hefur bundið kolefni sem svarar eigin losun vegna rekstrar og hefur verið með samning við Kolvið frá árinu 2015 og samning við SoGreen um menntaverkefni fyrir stúlkur frá árinu 2023.

Sjóvá birtir nánari upplýsingar og mælikvarða um umhverfismál, samfélag og stjórnarhætti í samræmi við UFS leiðbeiningar Nasdaq í kaflanum UFS mælikvarðar.

Hlutverk tilnefningarnefndar er að tilnefna einstaklinga til stjórnarsetu fyrir aðalfund félagsins. Skal nefndin vinna að hagsmunum allra hluthafa og gæta þess að einstaklingar sem tilnefndir eru búi sem heild yfir nægilegri þekkingu og reynslu til að rækja hlutverk sitt. Nefndinni ber einnig að leggja mat á hvort frambjóðendur séu óháðir félaginu eða hluthöfum sem eiga 10% hlut í félaginu eða meira. Tilnefningarnefnd er skipuð þremur nefndarmönnum sem kjörnir eru á aðalfundi. Nefndina skipa Katrín S. Óladóttir, formaður, sem fyrst var kjörin í nefndina á hluthafafundi 26. október 2018, Finnur R. Stefánsson og Sigríður Olgeirsdóttir sem voru kjörin í nefndina 11. mars 2022. Nefndin átti 4 fundi á árinu 2024.

Endurskoðunarnefnd starfar eftir starfsreglum á grundvelli IX. kafla A í lögum um ársreikninga nr. 3/2006. 108. gr. kveður á um skyldu eininga tengdum almannahagsmunum að starfrækja endurskoðunarnefnd. Endurskoðunarnefnd Sjóvár er skipuð þremur nefndarmönnum sem kosnir eru af stjórn félagsins. Hlutverk nefndarinnar er einkum að hafa eftirlit með vinnuferli við gerð reikningsskila, áhættustýringu og virkni innra eftirlits. Endurskoðunarnefnd skipa Hildur Árnadóttir formaður sem jafnframt situr í stjórn Sjóvá-Almennra trygginga hf., Anna Birgitta Geirfinnsdóttir og Friðrik Halldórsson. Nefndarmenn eru óháðir Sjóvá og Sjóvá lífi, óháðir daglegum stjórnendum félaganna og óháðir endurskoðendum.

Endurskoðunarnefnd fundar að lágmarki ársfjórðungslega og oftar ef þurfa þykir. Nefndin átti 7 fundi árið 2024.

Starfskjaranefnd markar starfskjarastefnu sem miðar að því að félagið sé ávallt samkeppnishæft og geti ráðið til sín framúrskarandi starfsfólk. Starfskjarastefnan nær yfir helstu atriði í starfs- og launakjörum forstjóra, stjórnenda og starfsmanna félagsins og skal fylgja mannréttindastefnu félagsins ásamt því að taka afstöðu til áhrifa launa á áhættutöku og stýringu félagsins í samráði við endurskoðunarnefnd. Starfskjarastefnu skal endurskoða árlega og skal greiða atkvæði um hana á hverjum aðalfundi. Á aðalfundi 2024 var samþykkt breyting á starfskjarastefnu sem gaf stjórn félagins heimild til að útfæra og samþykkja kaupréttaráætlun. Stjórn samþykkti slíka áætlun og var öllum fastráðnum starfsmönnum gefinn kostur á að gera kaupréttarsamning við félagið. Starfskjaranefnd er skipuð öllum stjórnarmönnum og átti nefndin fjóra fundi á árinu.

Ábyrgð og umsjón með sjálfbærnimálum er á skrifstofu forstjóra sem ber ábyrgð á upplýsingagjöf um sjálfbærni í samstarfi við fjármálasvið. Sjálfbærninefnd er starfandi hjá Sjóvá, en það er starfsnefnd á vegum forstjóra sem ætlað er að styðja við og styrkja stöðu félagsins á sviði sjálfbærni. Nefndin er skipuð sérfræðingum úr hópi starfsfólks og fulltrúi stjórnar situr einnig fundi hennar.

Í upplýsingagjöf um sjálfbærnimál hefur undanfarin ár verið stuðst við UFS leiðbeiningar Kauphalla Nasdaq á Norðurlöndum. Í ár er upplýsingagjöfin, líkt og í fyrra, einnig unnin með hliðsjón af tilskipun Evrópusambandsins um sjálfbærniupplýsingagjöf fyrirtækja (CSRD), sem felur í sér upplýsingagjöf í samræmi við ESRS staðlana, sem og upplýsingagjöf í samræmi við kröfur Flokkunarkerfis ESB fyrir sjálfbærar fjárfestingar (EU Taxonomy Regulation). Á árinu 2025 verður áfram unnið að undirbúningi gildistöku þessarar löggjafar og verða upplýsingar birtar í samræmi við þær í ársskýrslu á næsta ári.