Sjóvá heldur úti öflugu neti útibúa og þjónustuskrifstofa um allt land. Skrifstofur okkar í Reykjavík eru í Kringlunni 5 og þá eru starfrækt 10 útibú; í Reykjanesbæ, Vestmanneyjum, Borgarnesi, á Akranesi, Selfossi, Ísafirði, Akureyri, Dalvík, Húsavík og Egilsstöðum. Níu umboðs- og þjónustuaðilar starfa einnig vítt og breitt um landið.

Á árinu 2023 héldum við áfram að þétta starfsemi okkar og auka samvinnu ólíkra starfsstöðva. Markmið þessarar vinnu er að auka skilvirkni, samræma ráðgjöf og tryggja enn betur sama þjónustustig um land allt. Með aukinni samvinnu nýtist einnig betur sú mikla þekking sem starfsfólk okkar um allt land býr yfir, öllum viðskiptavinum til hagsbóta.

Í lok árs lengdum við opnunartíma útibúa víða um land, til samræmis við aðrar starfsstöðvar. Þá var stigið stórt skref þegar aðalsímanúmer okkar 440 2000 varð aðalnúmer allra útibúa og þjónustuskrifstofa. Með þessari breytingu hefur okkur tekist að auka svarhlutfall og stytta biðtíma í síma til muna. Breytingin var hluti af innleiðingu á nýju samskiptakerfi, sem gerir okkur ekki bara kleift að svara viðskiptavinum okkar hraðar en áður heldur auðveldar einnig aðgengi að ýmsum upplýsingum sem geta nýst við þjónustuna. Nú geta fleiri ráðgjafar sinnt símsvörun á sama tíma, álagið dreifist þannig betur milli starfsfólks og viðskiptavinir fá hraða þjónustu óháð staðsetningu. Síðustu mánuði ársins, þegar allar starfsstöðvar höfðu tekið nýja samskiptakerfið í notkun, hafði svarhlutfallið aldrei mælst hærra og biðtími í síma hafði aldrei verið styttri.

Við héldum áfram að þróa stafrænar lausnir okkar, enda um afar mikilvægar þjónustuleiðir að ræða sem sífellt fleiri nýta sér. Viðskiptavinir geta alltaf nálgast allar helstu upplýsingar um tryggingar sínar, tilkynnt tjón og fleira á Mitt Sjóvá og þá er hægt að sækja um fjölmargar tryggingar á Sjóvá.is, hvar og hvenær sem það hentar. Kannanir sem gerðar voru á árinu sýna að upplifun viðskiptavina af stafrænni þjónustu félagsins er góð og hvetur það okkur áfram á þessari braut.

Á árinu var bætt við þær tryggingar sem hægt er að sækja um rafrænt og er nú hægt að sækja um sjúkra- og slysatryggingu og almenna slysatryggingu á vefsíðu okkar Sjóvá.is. Við héldum áfram að bæta stafræna lausn okkar sem viðskiptavinir nota þegar þeir tilkynna tjón. Það kjósa alltaf fleiri og fleiri að tilkynna tjón til okkar í gegnum sjova.is og það gerir okkur kleift að afgreiða tjónin hraðar þegar tilkynningin berst með þeirri leið. Þess vegna leggjum við mikla áherslu á að gera ferlið við að tilkynna tjóna eins notendavænt og mögulegt er og erum sífellt að betrumbæta það. Miklar umbætur voru einnig gerðar á þeim þjónustulausnum sem starfsfólk notar við afgreiðslu tjóna, sem allar miða líka að því að gera okkur betur kleift að þjónusta viðskiptavini sem best.

Sjóvá lýtur eftirliti Fjármálaeftirlits Seðlabanka Íslands og hefur komið á samhæfðri áhættustýringu sem nær til allra rekstrarþátta félagsins og sett sér áhættustefnu sem lýsir umgjörð áhættustýringar. Áhættustefnan tekur til allra áhættuþátta sem krafist er í lögum um vátryggingastarfsemi og reglugerð um vátryggingastarfsemi. Stefnan var síðast endurnýjuð 6. desember 2023.

Stjórnkerfi og skipulag félagsins eru skráð í gæðakerfi þess. Leiðbeiningar fyrir starfsmenn félagsins miða að því að hver og einn beri ábyrgð á gæðum vinnu sinnar, þjónustu félagsins og upplýsingaöryggi. Innra eftirlit er innbyggt í verklagsreglur félagsins og eru innri úttektir og áhættugreiningar framkvæmdar reglulega.

Félagið leggur áherslu á skýra verkaskiptingu og ábyrgð. Uppbygging Sjóvár á eigin starfsemi er í samræmi við þrjár línur innra eftirlits. Tekið hefur verið saman heildstætt yfirlit um innra eftirlit, áhættukort (e. assurance map) sem gefur góðar upplýsingar um umfang eftirlits á öllum innri eftirlitsþáttum og gerir mögulegt að sannreyna niðurstöður og meta eftirlitið og umfang þess. Regluleg skýrslugjöf um rekstrarlega afkomu, sjálfbærniþætti, fjárfestingar, og einstök svið starfseminnar er mikilvægur þáttur innra eftirlits. Mánaðarlegar skýrslur um rekstrarlega afkomu og fjárfestingar, ársfjórðungslegar skýrslur um áhættustýringu, eigið áhættu- og gjaldþolsmat sem framkvæmt er að lágmarki árlega, árleg skýrsla um gjaldþol og fjárhagslega stöðu og reglubundnar skýrslur til eftirlitsaðila sem og aðrar reglulegar úttektir miða að því að tryggja gagnsæi í starfseminni. Þær auðvelda félaginu einnig að uppgötva og leiðrétta hugsanlegar skekkjur, fylgjast með frávikum og sveiflum í starfseminni og gefa svigrúm til að bregðast við ef áhættuþættir eða breytingar í rekstrarumhverfi gefa tilefni til. Framkvæmdastjórn fundar hið minnsta mánaðarlega með áhættu- og öryggisnefnd, ársfjórðungslega er farið yfir ytri áhættur og einstakir framkvæmdastjórar eiga að lágmarki árlegan fund með áhættu- og öryggisnefnd um áhættur ábyrgðarsviðs þeirra, fjalla um hvernig stýringu og eftirliti með áhættum er háttað og meta hvort það sé fullnægjandi.

Starfssvið áhættustjóra, regluvörslu, tryggingastærðfræðings og innri endurskoðanda teljast til lykilstarfssviða samkvæmt lögum um vátryggingastarfsemi og skulu þeir einstaklingar sem þeim sinna uppfylla sérstakar kröfur um hæfi og hæfni.

Tryggingastærðfræðingur félagsins hefur reglulegt eftirlit með því að iðgjaldaskrár endurspegli raunverulega vátryggingalega áhættu og séu í samræmi við afkomumarkmið. Tjónaskuld og endurtryggingavernd félagsins eru metnar með reglulegum hætti og þess gætt að þær séu í samræmi við þarfir félagsins og skuldbindingar þess. Auk þessa tekur tryggingastærðfræðingur saman árlega skýrslu fyrir stjórn félagsins um verkefni starfssviðsins, niðurstöður þeirra ásamt ábendingum.

Endurskoðun ársreiknings félagsins er í höndum KPMG ehf. sem kosið var á aðalfundi árið 2023 til eins árs. Innri endurskoðun ársins 2023 var útvistað til Ernst & Young ehf.

Hlutverk Sjóvá er „Við tryggjum verðmætin í þínu lífi“.

Framtíðarsýnin er „Sjóvá er tryggingafélag sem þér líður vel hjá“.

Vegvísarnir eru fjórir; verum á undan, höfum það einfalt, segjum það eins og það er og verum til staðar. Þeir eru leiðbeinandi í ákvörðunum stjórnar og starfsfólks og leggja grunn að þeirri framtíðarsýn sem unnið er að innan félagsins.

Sjóvá fylgir í hvívetna þeim lögum og reglum sem um starfsemina gilda. Leitast er við að stjórnarhættir séu í samræmi við leiðbeiningar um stjórnarhætti og þær kröfur sem gerðar eru til félagsins sem er eftirlitsskyldur aðili og skráður í kauphöll. Sjóvá hefur skýra stefnu um að vinna gegn hvers konar spillingu, glæpsamlegri starfsemi og peningaþvætti í öllum viðskiptum félagsins.

Sjóvá hefur verið aðili að Festu, miðstöð um samfélagsábyrgð frá árinu 2014.

Sjóvá vinnur að því að auka samþættingu áherslna Heimsmarkmiða Sameinuðu þjóðanna um sjálfbæra þróun við markmið í starfseminni. Tengt er við fimm heimsmarkmiðanna þ.e. markmið 3 um heilsu og vellíðan, 5 um jafnrétti kynjanna, 8 um góða atvinnu og hagvöxt, 12 um ábyrga neyslu og 13 um aðgerðir í loftslagsmálum. Í samræmi við eðli rekstrarins hefur megináhersla verið lögð á forvarnir, jafnréttismál, heilbrigðan rekstur og framþróun í samræmi við markmið 3, 5 og 8. Einnig er leitast við að tryggja ábyrga neyslu og stuðla að umhverfisvænum lausnum samkvæmt markmiði 12 og grípa til bráðra aðgerða gegn loftslagsbreytingum og áhrifum þeirra í samræmi við markmið 13.

Áherslur Sjóvá í forvörnum tengjast markmiði 3 um heilsu og vellíðan þar sem sett eru fram markmið um helmings fækkun alvarlega slasaðra og dauðsfalla vegna umferðarslysa fyrir árið 2030 og markmiði 12 um ábyrga neyslu og framleiðslu um að draga verulega úr sóun með forvörnum, minnkun úrgangs, aukinni endurvinnslu og endurnýtingu. Hjá Sjóvá hefur um árabil verið lögð mikil áhersla á að vinna með viðskiptavinum að forvörnum, bæði einstaklingum og fyrirtækjum. Sjóvá er með samstarfs- og bakhjarlssamning við Slysavarnafélagið Landsbjörg og á í fjölþættu samstarfi við samtökin, einkum á vettvangi forvarna.

Sjóvá hefur um árabil lagt áherslu á að tryggja jöfn tækifæri og jafnrétti kynja til ábyrgðar og launa í samræmi við heimsmarkmið 5 og 8. Mannréttindastefna og árleg aðgerðaáætlun eru rammi utan um framkvæmd stefnunnar.

Félagið hefur sett sér umhverfisstefnu, fylgist með þróun umhverfisvísa og notkun auðlinda í rekstrinum, og leitast er við að minnka losun gróðurhúsalofttegunda. Sjóvá hefur bundið kolefni sem svarar eigin losun vegna aksturs og flugsamgangna með samningi við Kolvið frá árinu 2015. Í tjónum og tjónavinnslu er leitast við að minnka sóun og stuðla að umhverfisvænum lausnum.

Birtar eru nánari upplýsingar og mælikvarðar um umhverfismál, samfélag og stjórnarhætti í samræmi við UFS leiðbeiningar Nasdaq í kaflanum UFS mælikvarðar. Sjóvá er í samstarfi við Klappir um sjálfbærnibókhald og rýni þess.

Hlutverk tilnefningarnefndar er að tilnefna einstaklinga til stjórnarsetu fyrir aðalfund félagsins. Skal nefndin vinna að hagsmunum allra hluthafa og gæta þess að einstaklingar sem tilnefndir eru búi sem heild yfir nægilegri þekkingu og reynslu til að rækja hlutverk sitt. Nefndinni ber einnig að leggja mat á hvort frambjóðendur séu óháðir félaginu eða hluthöfum sem eiga 10% hlut í félaginu eða meira. Tilnefningarnefnd er skipuð þremur nefndarmönnum sem kjörnir eru á aðalfundi. Nefndina skipa Katrín S. Óladóttir, formaður, sem fyrst var kjörin í nefndina á hluthafafundi 26. október 2018, Finnur R. Stefánsson og Sigríður Olgeirsdóttir sem voru kjörin í nefndina 11. mars 2022. Nefndin átti 7 fundi á árinu 2023.

Endurskoðunarnefnd starfar eftir starfsreglum á grundvelli IX. kafla A í lögum um ársreikninga nr. 3/2006. 108. gr. kveður á um skyldu eininga tengdum almannahagsmunum að starfrækja endurskoðunarnefnd. Endurskoðunarnefnd Sjóvá er skipuð þremur nefndarmönnum sem kosnir eru af stjórn félagsins. Hlutverk nefndarinnar er einkum að hafa eftirlit með vinnuferli við gerð reikningsskila, áhættustýringu og virkni innra eftirlits. Endurskoðunarnefndir Sjóvá og Sjóvá lífs skipa Hildur Árnadóttir formaður sem jafnframt situr í stjórn Sjóvá-Almennra trygginga hf., Anna Birgitta Geirfinnsdóttir og Friðrik Halldórsson. Nefndarmenn eru óháðir Sjóvá og Sjóvá lífi, óháðir daglegum stjórnendum félaganna og óháðir endurskoðendum.

Endurskoðunarnefnd fundar að lágmarki ársfjórðungslega og oftar ef þurfa þykir. Nefndin átti 13 fundi árið 2023.

Sjálfbærninefnd hefur það hlutverk að styðja við og styrkja stöðu samstæðunnar á sviði sjálfbærni og UFS þátta, þ.e. umhverfismála, félagsþátta og stjórnarhátta. Nefndinni er ætlað að stuðla að langtíma árangri í rekstri og sjálfbærni félagsins til framtíðar, tryggja að viðeigandi áætlanir og aðgerðir séu fyrir hendi til að stuðla að því að markmið samstæðunnar náist og fylgjast með framförum í átt að settum markmiðum.

Stjórn skipar fulltrúa í sjálfbærninefnd sem í sitja auk hans forstjóri, fjármálastjóri og sérfræðingar úr hópi starfsmanna. Fulltrúi stjórnar, Ingunn Agnes Kro, er jafnframt formaður nefndarinnar. Nefndin átti 4 fundi á árinu 2023.

Starfskjaranefnd markar starfskjarastefnu sem miðar að því að félagið sé ávallt samkeppnishæft og geti ráðið til sín framúrskarandi starfsfólk. Starfskjarastefnan nær yfir helstu atriði í starfs- og launakjörum forstjóra, stjórnenda og starfsmanna félagsins og skal fylgja mannréttindastefnu félagsins ásamt því að taka afstöðu til áhrifa launa á áhættutöku og -stýringu félagsins í samráði við endurskoðunarnefnd. Starfskjarastefnu skal endurskoða árlega og skal greiða atkvæði um hana á hverjum aðalfundi. Starfskjaranefnd er skipuð öllum stjórnarmönnum og átti nefndin þrjá fundi á árinu.

Í ársskýrslum undanfarinna ára hefur verið stuðst við UFS leiðbeiningar sem Kauphallir Nasdaq á Norðurlöndunum hafa sett fram um birtingu upplýsinga um sjálfbærni. Miklar breytingar eru hins vegar að verða á upplýsingagjöf um þessi málefni. Á árinu 2023 hófumst við handa við að undirbúa innleiðingu regluverks ESB, m.a. reglugerðar um flokkunarkerfi fyrir sjálfbæran rekstur fyrirtækja (EU Taxonomy). Einnig hófst vinna við að uppfylla kröfur reglna um form og efni sjálfbærniupplýsinga fyrirtækja og fjárfesta (CSRD) sem byggir á efni ESRS staðla sem EFRAG, Evrópsk ráðgjafarnefnd um reikningsskil, gefur út. Staðlarnir kveða á um hvernig upplýsingagjöf skuli háttað. Upplýsingarnar í þessari skýrslu eru settar fram með hliðsjón af þeim og verður áfram haldið vinnu við þessa innleiðingu hjá okkur á árinu 2024. Enn er þó stuðst við UFS leiðbeiningarnar að hluta á meðan ESRS innleiðingunni er ekki að fullu lokið.

• Sjóvá skuldbindur sig til að draga úr losun frá starfseminni milli ára og kolefnisbinda sem nemur þeirri losun sem óhjákvæmileg er frá starfsemi félagsins í lok hvers árs.
• Markmið eru um að draga úr losun frá eigin samgöngum, flugsamgöngum og ferðum starfsfólks til og frá vinnu.
• Sjóvá stefnir að því að eigin starfsemi verði kolefnishlutlaus og mun skoða leiðir fyrir þá vegferð á árinu.
• Sjóvá stefnir á að auka hlutfall viðskiptavina í rafrænum og pappírslausum viðskiptum og auka vefskráningu tjóna.

• Sjóvá gerir árlega mælingu á starfsánægju og starfsaðstæðum. Markmið Sjóvár er að starfsánægja sé meðal 8% efstu mælinga á starfsánægju í gagnagrunni Gallup á Íslandi.
• Sjóvá gerir árlega úttekt á jafnréttismálum og er jafnlaunastefna félagsins tekin út árlega af óháðum aðila. Sjóvá hefur markmið um að óleiðréttur launamunur kynja sé ekki meiri en 2%.
• Sjóvá hefur sett markmið um að hlutföll kynja séu sem jöfnust í öllum flokkum, þ.e. starfsfólks, framkvæmdastjórnar, stjórnendahóps, stjórna og nefnda og að meðaltal hlutfalla allra flokka sé milli 45% og 55%.

• Gerðar eru reglulegar mælingar á ánægju viðskiptavina á einstaklings- og fyrirtækjamarkaði, tryggð þeirra og ímynd starfseminnar og eru markmið um að vera efst í Íslensku ánægjuvoginni.
• Haldið er úti virku forvarnastarfi og áhættumati sem hefur þann tilgang að fyrirbyggja tjón og minnka líkur á skaða. Markmið eru um að auka forvarnir og áhættumat og byggja það starf á traustum grunni.
• Sjóvá leitast við að upplýsa viðskiptavini um kosti umhverfisvænni tjónaafgreiðslu og hefur það að markmiði að auka hana og minnka um leið sóun.
• Markmið er um að auka hlutfall viðskiptavina sem hafa líf- og sjúkdómatryggingar enda er það mikilvægur þáttur í að tryggja fjárhagslega afkomu við veikindi og önnur áföll.
• Sjóvá vinnur stöðugt að því að bæta þjónustuframboð og vörur þannig að þær svari þörfum viðskiptavina. Markmið um að setja fram 2-3 nýjungar á ári sem styðja við bætta þjónustuupplifun og að mæta þörfum samfélags og umhverfis um nútímalegar og ábyrgar tryggingalausnir.

• Sjóvá einsetur sér að vera fyrirmyndarfyrirtæki í stjórnarháttum. Markmið eru um að standast úttekt sem Fyrirmyndarfyrirtæki í stjórnarháttum á vegum Stjórnvísis og staðfesta að stjórnarhættir séu í samræmi við kröfur laga og leiðbeiningar um stjórnarhætti.
• Sjóvá er vottað eftir ISO27001 staðlinum um upplýsingaöryggi enda mikilvægt í starfseminni að tryggja öryggi í meðferð gagna. Markmið félagsins er að halda þeirri vottun.
• Sjóvá birtir árlega upplýsingar um markmið og árangur félagsins á UFS mælikvörðum í samræmi við UFS leiðbeiningar Nasdaq og birt eru sem hluti af árs- og sjálfbærniskýrslu félagsins og þáttur í því að auka gagnsæi í starfsemi félagsins. Stefnt er að því að uppfylla kröfur um birtingu upplýsinga í samræmi við ESRS staðla á árinu 2024.